२०८२ असार ३०, सोमबार १५:००
नयाँ दिल्ली । भारतका प्रधानमन्त्री नरेन्द्र मोदीले तेलुगु अभिनेता कोटा श्रीनिवास रावको निधनप्रति दुःख व्यक्त गरेका छन्। रावको ८३ वर्षको उमेरमा हैदराबादस्थित आफ्नै निवासमा शनिबार निधन भएको हो।
प्रधानमन्त्री मोदीले सामाजिक सञ्जाल ‘एक्स’मार्फत श्रद्धाञ्जली दिँदै लेखेका छन्, ‘कोटा श्रीनिवास राव गारुको निधनबाट म दुःखी छु। उहाँको सिनेमाटिक प्रतिभा र बहुमुखीपन सधैं सम्झिरहनेछ। उहाँले धेरै पुस्तालाई आफ्ना उत्कृष्ट अभिनयमार्फत मोहित पार्नुभयो। उहाँ सामाजिक सेवामा पनि अग्रमोर्चामा रहनुभयो र गरिब तथा वञ्चित समुदायको उत्थानका लागि समर्पित हुनुहुन्थ्यो। उहाँप्रति श्रद्धाञ्जली अर्पण गर्दछु। ॐ शान्ति।’
१९४२ जुलाई १० मा आन्ध्र प्रदेशको कंकिपाडुमा जन्मिएका रावले आफ्नो चलचित्र यात्रा सन् १९७८ मा ‘प्रणाम खरेडू’ नामक फिल्मबाट सुरु गरेका थिए। चार दशकभन्दा बढीको समयसम्म उनले ७५० भन्दा बढी चलचित्रहरूमा अभिनय गरे। विभिन्न खलपात्रदेखि हास्यप्रधान भूमिका होस् वा गम्भीर पात्र, रावले हर भूमिकालाई जीवन्त बनाउन सक्ने अद्वितीय क्षमता राख्थे।
सन् २०१५ मा भारत सरकारले उनलाई ‘पद्म श्री’ पुरस्कारद्वारा सम्मानित गरेको थियो। साथै, उनी राजनीति क्षेत्रमा समेत सक्रिय रहँदै सन् १९९९ देखि २००४ सम्म आन्ध्र प्रदेशको विजयवाडा पूर्व निर्वाचन क्षेत्रबाट विधायकसमेत रहेका थिए। उनको निधनपछि दक्षिण भारतीय फिल्म उद्योगमा शोकको लहर छाएको छ। अभिनेता चिरञ्जीवी, निर्देशक एसएस राजामौली, अभिनेता रवि तेजा, प्रकाश राजलगायतले सामाजिक सञ्जालमार्फत श्रद्धाञ्जली दिएका छन्।
