२०८३ भाद्र २७, शनिबार २२:४७
काठमाडौं। उसुका पूर्व खेलाडीहरूले २० औँ एसियाली खेलकुदमा पदक जित्ने उसु खेलाडीलाई प्रोत्साहन स्वरूप नगद ५० हजार रुपैयाँ प्रदान गर्ने भएका छन् ।
एसियाडमा सहभागी हुने उसु टोलीको उपस्थितिमा भएको कार्यक्रममा खेलाडीले कुनै पनि पदक जितेमा ५० हजार नगद पुरस्कार प्रदान गर्ने घोषणा गरेको नेपाल उसु महासंघका उप–महासचिव राजीव महर्जनले जनाएका छन् ।
कार्यक्रममा प्रिन्ट एक्सप्रेस र म नेपाली ब्रान्डका सञ्चालक अजय महर्जनले खेलाडी तथा प्रशिक्षकलाई टिसर्ट प्रदान गरेका थिए । सो अवसरमा ललितपुर जिल्ला खेलकुद विकास समितिका अध्यक्ष बिनोद महर्जनलगायतले खेलाडीलाई सफलताका लागि शुभकामना दिएका थिए ।
जापानको आइची नागोयामा असोज ३ देखि १८ गतेसम्म हुने एसियाडमा नेपालबाट उसुमा थाउलो र सान्सौंमा गरी १० खेलाडीले प्रतिस्पर्धा गर्ने भएका छन् ।
नेपालबाट आठ पुरुष र दुई महिला खेलाडी सहभागी हुँदै छन् । थाउलोमा ६ र सान्सौंमा चार खेलाडीले चुनौती पेस गर्ने छन् । थाउलोमा विजय सिन्जाली, हरिप्रसाद गोले, राजीव तामाङ, सुस्मिता तामाङ, दीपक हमाल र सविता राईले खेल्ने छन् ।
सान्सौंमा रोहित चुनारा, अमर सुनार, सन्जिव महर्जन र रिता ठकुल्ला सहभागी हुने छन् । थाउलो प्रशिक्षकमा प्रकाश महर्जन तथा सान्सौं प्रशिक्षकमा तुल्सीनन्द बज्राचार्य छन् ।
