२०८३ श्रावण १४, बिहीबार १९:१३
इरान र संयुक्त राज्य अमेरिकाबीच तनाव कम गर्ने उद्देश्यसहित वार्ता जारी रहेको मध्यस्थकर्ता पाकिस्तानले जनाएको छ। तर, अर्कोतर्फ अमेरिकाले जोर्डनमाथि भएको आक्रमणको जवाफमा इरानविरुद्ध ‘सशक्त आक्रमणको श्रृङ्खला’ सुरु गरेको दाबी गरेको छ।
पाकिस्तानी विदेश मन्त्रालयका प्रवक्ता ताहिर अन्द्राबीले बिहीबार इस्लामाबादमा पत्रकार सम्मेलन गर्दै हर्मुज जलमार्ग र तनाव न्यूनीकरणका विषयमा युद्धरत पक्षबीच छलफल जारी रहेको जानकारी दिएका छन्।
पाकिस्तानले स्थायी समाधानका लागि दुवै पक्षलाई वार्ताको टेबलमा ल्याउने प्रयास गरिरहेको जनाएको छ। यसअघि भएका वार्ता असफल भएपछि यस महिनाको सुरुमा युद्धविराम भंग भएको थियो र इरानले हर्मुज जलमार्ग बन्द गरेको थियो।
अमेरिकी सेनाले इरानमा गरिएको पछिल्लो आक्रमणलाई ‘गम्भीर लहरको आक्रमण’ भन्दै रिभोलुसनरी गार्डका सैन्य कमाण्ड केन्द्रसहित विभिन्न लक्ष्यमा प्रहार गरिएको जनाएको छ। अमेरिकी राष्ट्रपति डोनाल्ड ट्रम्पले जोर्डनमाथिको आक्रमणपछि इरानविरुद्ध कडा जवाफी कारबाही गर्ने चेतावनी दिएका थिए।
इरानी सरकारी सञ्चारमाध्यमका अनुसार खुजेस्तान प्रान्तका विभिन्न शहर र खाडी क्षेत्रमा रहेको क्वेश्म टापुमा आक्रमण भएको छ। यता जोर्डनले बिहीबार बिहान इरानी मिसाइलको नयाँ लहर रोकेको जनाएको छ।
कुवेतले पनि आफ्नो उत्तरी क्षेत्रमा रहेको चिनियाँ कम्पनीको भवनलाई लक्षित गरी इरानी आक्रमण भएको र त्यसबाट एक जनाको मृत्यु भएको जनाएको छ।
यसैबीच, इजिप्ट पहिलोपटक ड्रोन आक्रमणको चपेटामा परेको छ। भूमध्यसागरीय बन्दरगाहस्थित ग्यास आयात केन्द्रमा भएको आक्रमणपछि आगलागी भएको र दुईवटा जहाजमा क्षति पुगेको बताइएको छ। इजिप्ट सरकारले घटनाको अनुसन्धान भइरहेको जनाएको छ।
मध्यपूर्वमा जारी द्वन्द्वले ऊर्जा आपूर्ति, समुद्री व्यापार र क्षेत्रीय सुरक्षामा थप चुनौती सिर्जना गरेको छ। हर्मुज जलमार्गमा देखिएको तनावले विश्वव्यापी ऊर्जा बजारमा समेत प्रभाव पार्ने चिन्ता बढेको छ।
