२०८३ असार ३, बुधबार १२:४५
काठमाडौँ। चीनले आगामी जुलाईमा साङ्घाईमा विश्व कृत्रिम बुद्धिमत्ता (एआई) सम्मेलन तथा एआईसम्बन्धी विश्वव्यापी शासन व्यवस्थाबारे उच्चस्तरीय बैठक आयोजना गर्ने भएको छ।
चीनको राष्ट्रिय विकास तथा सुधार आयोगका उपप्रमुख झोउ हाइबिङले बुधबार आयोजित पत्रकार सम्मेलनमा सम्मेलनको जानकारी दिँदै एआई क्षेत्रमा अन्तरराष्ट्रिय सहकार्यलाई थप मजबुत बनाउन सम्मेलन महत्वपूर्ण अवसर बन्ने बताए।
उनका अनुसार कृत्रिम बुद्धिमत्ताको शासन व्यवस्था मानवताको भविष्यसँग जोडिएको विषय हो र यो सबै मुलुकले साझा रूपमा सामना गरिरहेको चुनौती पनि हो। चीनले बहुपक्षीयता, खुलापन र समावेशीताको सिद्धान्तलाई समर्थन गर्दै एआईको विश्वव्यापी शासन र अन्तरराष्ट्रिय सहकार्यलाई अघि बढाउँदै आएको उनले बताए।
झोउले बुद्धिमत्तायुक्त युगमा विश्व विकासका लागि चीनले आफ्ना अनुभव र समाधानहरू साझा गर्दै आएको उल्लेख गरे। उनले आगामी दिनमा चीनले एआईको विकास र सुरक्षाबीच सन्तुलन कायम गर्दै बहुपक्षीय सहकार्यलाई अझ सक्रिय रूपमा अगाडि बढाउने बताए।
उनका अनुसार चीनले ‘मानिस केन्द्रित’ र ‘सदुपयोगका लागि एआई’ भन्ने अवधारणालाई प्राथमिकतामा राखेर प्रविधिको विकास गर्ने नीति अवलम्बन गर्नेछ। साथै एआईसँग सम्बन्धित जोखिम व्यवस्थापन, सुरक्षा सुदृढीकरण तथा नियमनसम्बन्धी अन्तरराष्ट्रिय सहकार्यलाई पनि विस्तार गरिने उनले बताए।
चीनले प्रमुख राष्ट्रको जिम्मेवारी निर्वाह गर्दै एआईका सम्भावित सुरक्षा जोखिम न्यूनीकरणका लागि अन्य देशहरूसँग मिलेर काम गर्ने तथा सुरक्षित र जिम्मेवार एआई विकासलाई प्रोत्साहन गर्ने प्रतिबद्धता व्यक्त गरेको छ।
साङ्घाईमा हुने सम्मेलनमा विभिन्न देशका सरकारी अधिकारी, प्रविधि कम्पनीका प्रतिनिधि, अनुसन्धानकर्ता तथा एआई क्षेत्रका विज्ञहरूको सहभागिता रहने अपेक्षा गरिएको छ।
