२०८३ जेष्ठ २१, बिहीबार १९:२२
काठमाडौँ । नेपाली कांग्रेसका सभापति गगन थापाले मुलुकमा सुशासन स्थापना गर्न सरकारले गर्ने संविधानसम्मत र कानुनसम्मत सबै प्रयासहरूमा कांग्रेसको पूर्ण साथ रहने बताएका छन्।
बिहीबार पार्टी कार्यालय सानेपामा आयोजित ‘ग्रीन टेबल’ कार्यक्रममा बोल्दै थापाले सुशासन स्थापनाका लागि हालै भएका युवा आन्दोलनको सन्दर्भ उल्लेख गर्दै सरकारका सकारात्मक प्रयासहरूलाई कांग्रेसले पूर्ण समर्थन गर्ने स्पष्ट पारे।
उनका अनुसार सुशासनका पक्षमा भदौ २३ र २४ गते युवाहरूले गरेको आन्दोलनले पनि राज्य सञ्चालनमा पारदर्शिता र जवाफदेहिताको आवश्यकता झल्काएको छ। उनले सुशासन स्थापना गर्ने उद्देश्यले सरकारका तर्फबाट गरिने सबै संविधानसम्मत र कानुनसम्मत कदममा नेपाली कांग्रेसको शतप्रतिशत सहयोग रहने बताए।
थापाले वर्तमान सरकारले सार्वजनिक पद धारण गरेका व्यक्तिहरूको सम्पत्ति छानबिन गर्न आयोग गठन गरेको प्रसङ्गमा बोल्दै आफू तथा नेपाली कांग्रेसका सबै सदस्यले आवश्यक सम्पत्ति विवरण बुझाउने जानकारी दिए।
उनले केही पूर्वन्यायमूर्ति तथा केही राजनीतिक दलका नेताहरूले सम्पत्ति विवरण नबुझाउने भनिरहेका विषयमा कांग्रेसको कुनै टिप्पणी नरहेको स्पष्ट पारे। साथै उनले सम्पत्ति छानबिन प्रक्रियालाई आयोगले निरन्तरता दिनुपर्नेमा जोड दिए।
थापाले सम्पत्ति छानबिन गर्ने आयोगले गर्ने कामहरूको स्वच्छता, निष्पक्षता र पारदर्शितामाथि कुनै प्रश्न उठ्न नहुने तर्क पनि प्रस्तुत गरे। उनका अनुसार यस्तो संवेदनशील प्रक्रियामा विश्वास कायम राख्न आयोग पूर्ण रूपमा पारदर्शी र कानुनसम्मत रूपमा अघि बढ्नुपर्छ।
उनले सुशासन कायम गर्न राज्यका सबै निकाय, राजनीतिक दल तथा नागरिक समाजको सहकार्य आवश्यक रहेको उल्लेख गर्दै कांग्रेस यस प्रक्रियामा जिम्मेवार भूमिकामा रहने बताए।
पार्टीभित्र र बाहिर दुवै तहमा पारदर्शिता र जवाफदेहिताको अभ्यासलाई बलियो बनाउँदै अघि बढ्नुपर्ने उनको भनाइ थियो।
