काठमाडौं । विश्व वातावरण दिवसको अवसरमा आयोजना हुँदै आएको ‘सांग्रिला साइकल र्‍याली’को चौथो संस्करण यही जेठ २३ गते शनिबार काठमाडौंमा आयोजना हुने भएको छ। वातावरण संरक्षण, स्वस्थ जीवनशैलीको प्रवर्द्धन तथा साइकलमैत्री शहर निर्माणको सन्देश फैलाउने उद्देश्यले सांग्रिला डेभलपमेन्ट बैंक लिमिटेडले र्‍याली आयोजना गर्न लागेको हो।

बैंकले सोमबार जारी गरेको प्रेस विज्ञप्तिअनुसार चौथो सांग्रिला साइकल र्‍याली राजधानीको गैरीधारास्थित एलिस रिसेप्सनबाट बिहान ७ बजे सुरु हुनेछ। र्‍याली दरबारमार्ग, सुन्धारा, त्रिपुरेश्वर, थापाथली, माइतीघर, नयाँ बानेश्वर, पुरानो बानेश्वर, गौशाला, रातोपूल, जैन भवन तथा बालुवाटारस्थित सांग्रिला डेभलपमेन्ट बैंकको केन्द्रीय कार्यालय हुँदै पुनः एलिस रिसेप्सनमा पुगेर समापन हुनेछ।

र्‍यालीमा वातावरणप्रेमी, साइकलप्रेमी, विद्यार्थी, युवा तथा सर्वसाधारण नागरिकहरूको सहभागिता रहने अपेक्षा गरिएको बैंकले जनाएको छ। विगतका संस्करणहरूमा जस्तै यस वर्ष पनि ठूलो संख्यामा सहभागी जुट्ने विश्वास आयोजकको छ।

बैंकका अनुसार र्‍यालीमा सहभागी हुन इच्छुक व्यक्तिले मोबाइल नम्बर ९८६३५८९००१ मा ‘Registration’ लेखी पठाएर नाम दर्ता गर्न सक्नेछन्। त्यसैगरी आयोजकले उपलब्ध गराएको अनलाइन लिंक वा क्यूआर कोड स्क्यान गरेर पनि सहभागिताका लागि नाम दर्ता गर्न सकिने व्यवस्था गरिएको छ।

र्‍यालीलाई थप आकर्षक बनाउन सहभागीहरूमध्ये एक जना भाग्यशाली विजेतालाई गोलाप्रथामार्फत आकर्षक साइकल उपहार प्रदान गरिनेछ। साथै अन्य विभिन्न उपहारहरूको समेत व्यवस्था गरिएको आयोजकले जनाएको छ।

सांग्रिला डेभलपमेन्ट बैंकले वातावरणीय सन्तुलन कायम राख्न, कार्बन उत्सर्जन न्यूनीकरण गर्न तथा वैकल्पिक यातायात साधनको प्रयोगलाई प्रोत्साहन गर्न साइकल संस्कृतिको विकास आवश्यक रहेको उल्लेख गरेको छ। यही उद्देश्यलाई आत्मसात गर्दै बैंकले विगतमा पनि सफलतापूर्वक तीन संस्करणका साइकल र्‍याली आयोजना गरिसकेको छ।

बैंकका अनुसार पछिल्ला वर्षहरूमा काठमाडौं उपत्यकामा वायु प्रदूषण, ट्राफिक जाम र वातावरणीय चुनौतीहरू बढिरहेका बेला साइकलको प्रयोगले दिगो तथा वातावरणमैत्री यातायात प्रणाली विकासमा योगदान पुर्‍याउन सक्छ। त्यसैले र्‍याली केवल मनोरञ्जनात्मक कार्यक्रम मात्र नभई वातावरणीय सचेतना अभिवृद्धिको अभियानसमेत हो।

आयोजकले वातावरण संरक्षणप्रति सचेत नागरिक, साइकलमैत्री शहरको अवधारणामा विश्वास गर्ने समूह तथा विभिन्न संघसंस्थालाई कार्यक्रममा सहभागी हुन आह्वान गरेको छ।

सांग्रिला डेभलपमेन्ट बैंकले हाल देशभर १०९ वटा शाखा कार्यालय तथा ३० वटा एटीएममार्फत बैंकिङ सेवा प्रदान गर्दै आएको छ। संस्थागत सुशासन, जोखिम व्यवस्थापन तथा आन्तरिक नियन्त्रण प्रणालीको प्रभावकारी अभ्यासमार्फत बैंकले आफ्नो सेवा विस्तार गर्दै लगेको जनाएको छ।

बैंकले आगामी दिनमा वित्तीय सेवासँगै सामाजिक उत्तरदायित्वका कार्यक्रमलाई पनि निरन्तरता दिने प्रतिबद्धता व्यक्त गरेको छ। चौथो सांग्रिला साइकल र्‍यालीलाई पनि सामाजिक उत्तरदायित्व तथा वातावरणीय संरक्षण अभियानको महत्वपूर्ण हिस्सा मानिएको छ।

ADVERTISEMENT