२०८३ जेष्ठ १०, आईतवार १३:२२
काठमाडौं । रियल म्याड्रिडले ला लिगा सिजनको अन्तिम खेलमा एथलेटिक क्लबलाई ४-२ ले पराजित गर्दै प्रशिक्षक अल्भारो अर्बेलोआको कार्यकाल सुखद जितसहित समाप्त गरेको छ ।सान्टियागो बेर्नाबेउमा शनिबार भएको खेलमा गोन्जालो गार्सिया, जुड बेलिङ्घम, किलियन एम्बाप्पे र ब्राहिम डियाजले रियलका लागि गोल गरेका थिए ।
खेल रियलका अनुभवी खेलाडी दानी कार्भाजाल र डाभिड अलाबाका लागि पनि विशेष बन्यो । दुवै खेलाडीले घरेलु मैदानमा आफ्नो रियल करियरलाई भावुक रूपमा बिदाइ गरेका छन् ।रियलका लागि आफ्नो ४ सय ५१औं तथा अन्तिम खेल खेलिरहेका कार्भाजालले टोलीलाई उत्कृष्ट सुरुआत दिलाए । उनको आकर्षक पासमा गोन्जालो गार्सियाले ११औं मिनेटमा गोल गर्दै घरेलु टोलीलाई अग्रता दिलाए ।
पहिलो हाफ सकिन चार मिनेट बाँकी रहँदा जुड बेलिङ्घमले रियलको अग्रता दोब्बर बनाए । थियागो पिटार्चको लोफ्टेड पासमा उनले शानदार लेफ्ट फुट भल्लीमार्फत गोल गरे ।तर इन्जुरी समयमा एथलेटिक क्लब खेलमा फर्कियो । इनाकी विलियम्सको क्रसमा गोर्का गुरुजेत्ताले पहिलो टचमै आकर्षक गोल गर्दै अन्तर घटाए ।
दोस्रो हाफ सुरु भएको ६ मिनेटमै किलियन एम्बाप्पेले गोल गर्दै रियललाई पुनः दुई गोलको अग्रता दिलाए । अल्भारो कारेरासको पासलाई उनले उत्कृष्ट रूपमा सदुपयोग गरेका थिए ।रियलले त्यसपछि लगातार दबाब कायम राख्यो । एम्बाप्पे र बेलिङ्घमका थप प्रयासहरू एथलेटिकका गोलरक्षक एलेक्स पाडिल्लाले रोकेका थिए ।
७०औं मिनेटमा डाभिड अलाबा मैदानबाट बाहिरिँदा घरेलु समर्थकहरूले उभिएर सम्मान व्यक्त गरेका थिए । त्यसपछि खेलको अन्त्यतिर कार्भाजाल बाहिरिँदा दुवै टोलीका खेलाडीहरूले उनलाई ‘गार्ड अफ अनर’ दिएका थिए ।
८८औं मिनेटमा ब्राहिम डियाजले रियलका लागि चौथो गोल थपे । इन्जुरी समयमा उर्को इजेत्ताले एथलेटिकका लागि अर्को गोल फर्काए पनि त्यो पर्याप्त बन्न सकेन ।
अर्को सिजन टोलीको जिम्मेवारी नसम्हाल्ने घोषणा गरिसकेका प्रशिक्षक अर्बेलोआका लागि एम्बाप्पेले उत्कृष्ट प्रदर्शनमार्फत सुखद बिदाइ दिलाए । एम्बाप्पेले यस सिजन ४७ खेलमा ४३ गोल र ६ असिस्ट गर्दै कुल ४९ गोल योगदान दिएका छन् ।
यस जितसँगै रियल म्याड्रिडले एथलेटिक क्लबविरुद्ध घरेलु मैदानमा आफ्नो अपराजित यात्रा २१ खेलसम्म पुर्याएको छ ।
उता, ला लिगा च्याम्पियन बार्सिलोना भने सिजनको अन्तिम खेलमा भ्यालेन्सियासँग ३-१ ले पराजित भएको छ ।
