२०८२ चैत्र ११, बुधबार १२:३८
सुनसरी। सुनसरीको इटहरीस्थित पूर्वाञ्चल क्याफे तथा आइसक्रिम पार्लरमा बुधबार अचानक आगलागी भएको छ। इटहरी उपमहानगरपालिका–६ को कोसी राजमार्ग आसपासको व्यस्त बजार क्षेत्रमा रहेको उक्त क्याफेको भान्सा तथा तल्लो तलाबाट सुरु भएको आगलागीले संरचनामा क्षति पुर्याएको इलाका प्रहरी कार्यालय इटहरीले जनाएको छ।
प्रहरीका अनुसार आगलागीका कारण क्याफेको तल्लो तलामा रहेका भान्सा सामग्री, फर्निचर तथा विद्युत उपकरणमा क्षति पुगेको प्रारम्भिक अनुमान गरिएको छ। आगलागीका कारण वरपरका केही घर तथा पसलहरूमा समेत आंशिक असर परेको जनाइएको छ, यद्यपि ठूलो मानवीय क्षति भने हुन पाएन।
आगो सुरु हुने बित्तिकै स्थानीयवासीले प्रहरी र दमकललाई खबर गरेका थिए। त्यसपछि इटहरी, धरान तथा आसपासका पालिकाबाट आएका बारुणयन्त्र, सुरक्षाकर्मी र स्थानीयको संयुक्त प्रयासमा आगो नियन्त्रणमा लिइएको हो। व्यस्त बजार क्षेत्र भएकाले आगो फैलिने जोखिम उच्च भए पनि समयमै नियन्त्रणमा ल्याइएकाले ठूलो क्षति हुनबाट जोगिएको प्रहरीले जनाएको छ।
प्रहरीले आगलागीको कारण यकिन हुन बाँकी रहेको बताउँदै विद्युत सर्टका कारण घटना भएको हुनसक्ने प्रारम्भिक अनुमान गरेको छ। घटनाबारे विस्तृत अनुसन्धान भइरहेको जनाइएको छ।
यसअघि इटहरी उपमहानगरपालिकाको आफ्नै दमकल जलेर नष्ट भएको कारण अन्य पालिकाबाट बारुणयन्त्र ल्याउनुपरेको थियो, जसले आपतकालीन व्यवस्थापनमा चुनौती थपिएको स्थानीयले बताएका छन्।आगलागीबाट भएको क्षतिको विस्तृत विवरण संकलन गर्ने काम भइरहेको प्रहरीले जनाएको छ।
