२०८२ फाल्गुन ८, शुक्रबार १५:३५
पाेखरा । सिटिजन लाइफ इन्स्योरेन्स कम्पनीले पाेखरामा मिलिएन डलर राउन्ड टेबल (एमडीआरटी) सम्मान तथा प्रशिक्षण कार्यक्रम सम्पन्न गरेको छ । कार्यक्रम फागुन ५ देखि ७ गतेसम्म हाेटल पाेखरा ग्रान्डमा भव्य रूपमा आयोजना गरिएको थियो ।
कार्यक्रममा कुल ७० जना सिटिजन लिडरहरुलाई सम्मान गरिएको इन्स्योरेन्सले जनाएकाे छ । जसअन्तर्गत ६७ जना एमडीआरटी, दुईजना काेरट अफ टेबल (सिओटी) तथा १ जना टप अफ द टेबल (टिओटी) क्वालिफायर रहेका थिए । सँगै सिनियर एजेन्सी म्यानेजर, उत्कृष्ट कार्यसम्पादन छनोट भएका शाखा प्रमुख तथा क्षेत्रीय प्रमुखहरुको समेत सहभागिता रहेको इन्स्योरेन्सले जनाएकाे छ ।
कार्यक्रमको उद्देश्य उत्कृष्ट कार्यसम्पादन गर्ने लिडरहरुलाई सम्मान गर्नुका साथै आगामी व्यावसायिक लक्ष्य तथा रणनीतिबारे छलफल र सशक्त प्रशिक्षण प्रदान गर्नुरहेको थियो । कार्यक्रमअन्तर्गत द सेकरेट अफ प्राेग्रेसिभ लाइफ विषयमा सेल्स कोच तथा मोटिभेशनल स्पीकर डा. रबिन कटवालले विशेष प्रशिक्षण सत्र सञ्चालन गरेका थिए । यसबाट सहभागीहरूलाई व्यक्तिगत तथा व्यवसायिक विकासका लागि प्रेरित गरेको कम्पनीले जनाएको छ ।
कार्यक्रममा कम्पनीका प्रशिक्षण विभाग प्रमुख कुबेर पाठक, प्रमुख वित्तीय अधिकृत गोपाल पंगेनी, प्रमुख बजार व्यवस्थापन अधिकृत भुषण रिमाल तथा प्रमुख कार्यकारी अधिकृत पोषकराज पौडेलले आ–आफ्नो प्रस्तुति तथा मार्गदर्शन प्रदान गरेका थिए । साथै, कम्पनीका ब्राण्ड एम्बेसडरहरू मदनकृष्ण श्रेष्ठ तथा हरिवंश आचार्यको विशेष उपस्थिति थियो । उनीहरूले सहभागीहरूलाई सम्बोधन गर्दै हाँस्य व्यंग्यमार्फत उत्साह थप्नुका साथै एमडीआरटी क्वालिफायरहरूलाई सम्मान समेत गरेका थिए ।
समापन समारोहमा प्रमुख कार्यकारी अधिकृत पोषकराज पौडेलले कम्पनीको निरन्तर प्रगति र सफलताको प्रमुख आधार सिटिजन लिडरहरुको समर्पण, प्रतिबद्धता र उत्कृष्ट कार्यसम्पादन रहेको उल्लेख गर्दै सम्पूर्ण सहभागीहरूलाई धन्यवाद ज्ञापन गरे । उनले आगामी दिनहरूमा अझै उच्च उपलब्धि हासिल गर्ने विश्वास व्यक्त गरे ।
समग्रमा एमडीआरटी कार्यक्रम भव्य, प्रभावकारी तथा पूर्ण रूपमा सफल भएको कम्पनीले जनाएको छ । यस्तो प्रकारका कार्यक्रमले लिडरहरुलाई थप उत्प्रेरणा प्रदान गर्नुका साथै व्यवसाय विस्तार र व्यक्तिगत क्षमताको अभिवृद्धिमा महत्वपूर्ण योगदान पुर्याउने विश्वास कम्पनीले लिएको छ ।
