२०८२ फाल्गुन ८, शुक्रबार ०८:४६
काठमाडौँ। देशका विभिन्न जिल्लाबाट लागुपदार्थसहित १६ जना पक्राउ परेका छन्। नियमित सुरक्षा गस्ती तथा विशेष सूचनाका आधारमा सञ्चालन गरिएको कारबाहीका क्रममा उनीहरूलाई बुधबार र बिहीबार नियन्त्रणमा लिइएको प्रहरीले जनाएको छ।
नेपाल प्रहरीको केन्द्रीय प्रहरी समाचारकक्षका अनुसार झापाबाट दुई जना, मोरङबाट एक जना, सिरहाबाट तीन जना, कास्कीबाट तीन जना, बाँकेबाट तीन जना, कैलालीबाट दुई जना र मकवानपुरबाट दुई जना पक्राउ परेका हुन्।
प्रहरीका अनुसार पक्राउ परेकाहरूको साथबाट खैरो हिरोइन तथा चिकित्सकको पूर्जीबिना खरिदबिक्री गर्न नपाइने विभिन्न प्रकारका प्रतिबन्धित औषधि बरामद गरिएको छ। बरामद लागुऔषधको परिमाण र प्रकृतिबारे सम्बन्धित जिल्ला प्रहरी कार्यालयहरूले थप अनुसन्धान गरिरहेको जनाइएको छ।
झापामा लागूऔषध ओसारपसार भइरहेको सूचनाका आधारमा चेकजाँचका क्रममा दुई जनालाई नियन्त्रणमा लिइएको प्रहरीले जनाएको छ। यस्तै मोरङ र सिरहामा पनि सवारी साधन तथा व्यक्तिको जाँच गर्ने क्रममा शंकास्पद अवस्थामा फेला परेपछि लागूऔषधसहित तीन जनालाई पक्राउ गरिएको हो।
कास्कीमा विशेष निगरानीका क्रममा तीन जना लागूऔषधसहित फेला परेका थिए। बाँके र कैलालीमा सीमा नाकालाई लक्षित गरी गरिएको चेकजाँचका क्रममा केही व्यक्तिबाट प्रतिबन्धित औषधि र खैरो हिरोइन बरामद भएको प्रहरीले उल्लेख गरेको छ। मकवानपुरमा भने नियमित गस्तीका क्रममा दुई जनालाई लागूऔषधसहित नियन्त्रणमा लिइएको जनाइएको छ।
पक्राउ परेकाहरूविरुद्ध सम्बन्धित जिल्ला अदालतबाट म्याद थप गरी लागूऔषध सम्बन्धी कसुरअन्तर्गत अनुसन्धान भइरहेको प्रहरीले जनाएको छ। लागूऔषधको अवैध कारोबार नियन्त्रणका लागि देशभर निगरानी र चेकजाँचलाई कडाइ गरिएको पनि केन्द्रीय प्रहरी समाचारकक्षले जानकारी दिएको छ।
