२०८२ फाल्गुन ६, बुधबार ०९:१४
चितवन। नेपाल लेयर्स सङ्घले आजदेखि लागू हुनेगरी अण्डाको मूल्य वृद्धि गरेको छ। सङ्घले जारी गरेको नयाँ दरअनुसार ठूलो अण्डा प्रतिक्रेट रु ४२५ र मझौला अण्डा प्रतिक्रेट रु ३७५ तोकिएको छ।
सङ्घका अनुसार पछिल्लो समय अण्डा उत्पादनमा लाग्ने लागत उल्लेखनीय रूपमा बढेको छ। दाना, औषधि, ढुवानी तथा श्रम खर्चमा वृद्धि भएपछि मूल्य समायोजन गर्नुपरेको जनाइएको छ। हाल प्रतिगोटा अण्डाको उत्पादन लागत १९ रुपैयाँ १२ पैसा पुगेको सङ्घले जानकारी दिएको छ।
उत्पादकहरूले लागतअनुसार मूल्य नसमायोजन गर्दा किसानहरू मारमा पर्ने अवस्था आएको दाबी गरेका छन्। कुखुरा पालन व्यवसायीहरूका अनुसार दानाको मूल्यमा निरन्तर वृद्धि, इन्धन खर्च र अन्य सञ्चालन खर्च बढ्दा उत्पादन लागत थप चापमा परेको छ।
नयाँ मूल्य लागू भएसँगै बजारमा खुद्रा मूल्य पनि केही बढ्ने अनुमान गरिएको छ। खुद्रा विक्रेताले ढुवानी तथा खुद्रा मार्जिन जोडेर मूल्य निर्धारण गर्ने भएकाले उपभोक्ताले अण्डा किन्दा केही बढी मूल्य तिर्नुपर्ने अवस्था आउन सक्ने बताइएको छ।
नेपालमा दैनिक रूपमा ठूलो परिमाणमा अण्डा उत्पादन हुँदै आएको छ। चितवन, काठमाडौँ उपत्यका, रुपन्देहीलगायत जिल्लामा व्यावसायिक रूपमा कुखुरा पालन हुँदै आएको छ। अण्डा नेपाली उपभोक्ताको दैनिकीमा महत्त्वपूर्ण खाद्यवस्तुका रूपमा स्थापित भएकाले मूल्य वृद्धिले प्रत्यक्ष रूपमा उपभोक्तालाई असर पार्ने देखिन्छ।
सङ्घले बजारको अवस्था र उत्पादन लागतको आधारमा समय–समयमा मूल्य समायोजन गर्दै आएको जनाएको छ।
