२०८२ कार्तिक १६, शनिवार ०७:३७
काठमाडौँ । प्रधानमन्त्री सुशीला कार्कीले आउँदो फागुन २१ गतेका लागि निर्धारण गरिएको चुनाव सफल बनाउन सबैको साथ र सहयोग जरुरी रहेको बताएकी छन् ।
प्रधानमन्त्री निवास बालुवाटारमा हिजो उनले विभिन्न सञ्चारमाध्यमका सम्पादकसँग देशको समसामयिक राजनीतिक विषय, चुनावको तयारी, सरकारको काम कारवाहीलगायतका विषयमा छलफल गर्नुभएको उनको सचिवालयले जनाएको छ ।
प्रधानमन्त्री कार्कीले चुनावका लागि आवश्यक वातावरण बनाउन सरकारका तर्फबाट अधिकत्तम प्रयास भइरहेको र क्रमशः वातावरण बन्दै गएको तथा यसबीचमा जेनजी, राजनीतिक दलबीचमा छलफल भएको समेत जानकारी दिए ।
सबैलाई विश्वासमा लिएर चुनाव सफल बनाउने र नयाँ सरकारलाई जिम्मा लगाएर विदा हुने मनसायमा आफू रहेको समेत प्रधानमन्त्री कार्कीको भनाइ थियो ।
सुशासन कायम गर्ने र चुनाव गराउने सरकारको प्रमुख उद्देश्य रहेको उल्लेख गर्दै प्रधानमन्त्री कार्कीले राजनीतिक दललाई निषेध गरेर नभई उत्साहपूर्वक सहभागिता गराएर फागनु २१ को चुनाव सम्पन्न गर्दै सत्ता हस्तान्तरण गर्ने बताए ।
आफूले असहज अवस्थामा सरकारको नेतृत्व लिएको स्पष्ट पार्दै प्रधानमन्त्री कार्कीले आलोचनाबाट नडराउने बताइन ।
