काठमाडौं । नेपाली कांग्रेसको पदाधिकारी बैठक बिहीबार बस्दैछ । कांग्रेस सभापति शेरबहादुर देउवाले असोज २६ गते बस्ने केन्द्रीय समिति बैठकको तयारीका लागि पदाधिकारी बैठक बोलाएका हुन् ।

बिहीबार दिउँसो १ बजेका लागि बोलाइएको कांग्रेस पदाधिकारी बैठकमा देउवा भने नजाने भएका छन् । उपसभापति पूर्णबहादुर खड्काले बैठक चलाउने भएका छन् ।

भदौ २३ र २४ गतेको जेनजी विद्रोहपछि पहिलोपटक देउवा पार्टी बैठकमा सहभागी हुने भनिएको थियो । तर उनका स्वकीय सचिव भानु देउवाले बैठकमा सभापति नजाने जानकारी दिए।

जेनजी विद्रोहका क्रममा कुटपिटमा परेका देउवाले पार्टीबाट सम्मानजनक बहिर्गमन चाहेका छन्। देउवाले पदाधिकारी बैठकबाट नेताहरुको मोटामोटी धारणा जान्न चाहेका छन् । अस्पतालबाट दसैँअघि नै डिस्चार्ज भएका देउवा महाराजगन्जस्थित एक घरमा भाडामा बसेका छन् ।

बैठकस्थलबारे अहिलेसम्म कसैलाई जानकारी गराइएको छैन । ललितपुरको कुनै एक होटलमा पदाधिकारी बैठक बस्ने भएको छ । तर असोज २६ को केन्द्रीय समिति बैठक भने कांग्रेस केन्द्रीय कार्यालयमै बस्ने नेताहरुको भनाइ छ ।