२०८२ आश्विन ८, बुधबार ०९:५३
काठमाडौं । वरिष्ठ अधिवक्ता डाक्टर सुरेन्द्र भण्डारीको नेतृत्वमा नयाँ पार्टी खुल्ने भएको छ । ‘नेपाल नागरिक पार्टी’ नाम राखिएको छ ।
पार्टी दर्ताका लागि बिहीबार निर्वाचन आयोगमा निवेदन दिने तयारी रहेको पार्टीको तदर्थ समितिका संयोजक डाक्टर भण्डारीले जानकारी दिए । ४१ देखि ५१ सदस्य केन्द्रीय समिति रहनेगरी निवेदन दिने तयारी रहेको उनले बताए ।
पार्टीमा अमृत खरेल, डा। दमनध्वज साउद, लेलिन विष्ट, डा.कमल किरण कटुवाल, डा। महेन्द्रजंग शाह, नुर मोहम्मद मिया, डा. राजेन्द्रप्रसाद न्यौपाने, राजेश काफ्ले, डा। सञ्जय खतिवडालगायत पार्टीमा रहने उनले जानकारी दिए ।
भ्रष्टाचारविरुद्ध ‘नेपालका लागि नेपाली’ अभियान चलाएका भण्डारीले यसअघि पनि पार्टी खोल्ने तयारी गरेका थिए । भ्रष्टाचारविरुद्ध उनको नेतृत्वमा भएको अभियान चर्चित भएको थियो ।
अभियानमाथि चितवनमा माओवादी र काठमाडौंमा एमालेनिकटको युवा संघ नेपालले आक्रमण गरेका थिए । त्यतिबेला भण्डारीसहित हालका राप्रपा प्रवक्ता समेत रहेका ज्ञानबहादुर शाही आक्रमणमा परेका थिए ।
उक्त आक्रमणपछि शाहीले अभियानै छोडेका थिए । त्यसपछि अभियानका अन्य सदस्यहरू पनि विभिन्न पार्टीतर्फ लागेपछि वरिष्ठ अधिवक्ता भण्डारी भने आफ्नै पेसा र भ्रष्टाचारविरुद्धको वकालतमा सीमित भएका थिए ।
अहिले पढेलेखेका र देशका लागि केही गरौँ भन्ने हुटहुटी बोकेका युवाको टिम लिएर राजनीतिक पार्टी दर्ता हुन लागेको उनले जानकारी दिए ।
