२०८२ आश्विन २, बिहिवार ११:५९
चितवन । जेनजी आन्दोलनपछि मुख्य पर्यटकीय सिजनमा सौराहाका होटलहरुमा पर्यटकले धमाधम बुकिङ रद्द गरेका छन् । पर्यटकीय याममा समेत पर्यटकले बुकिङ रद्द गरेपछि नेपालको अर्थतन्त्रमा ठूलो असर पर्ने देखिएको छ ।
गत भदौ २३ र २४ गतेको जेनजी आन्दोलनपछि अन्तर्राष्ट्रिय जगतमा नकारात्मक सन्देश प्रवाह हुँदा अधिकांश होटलका बुकिङ रद्द भएको जनाइएको छ ।
क्षेत्रीय होटल संघ सौराहाका अध्यक्ष ओम पाण्डेले सेप्टेम्बरका लागि बुकिङ भएका होटल शतप्रतिशत रद्द भएको जानकारी दिए । उनका अनुसार आगामी महिनाहरुका लागि भएका बुकिङ पनि रद्द भइरहेको छ । ‘यो महिनामा ६५ देखि ७० प्रतिशत होटलका कोठा बुकिङ भएका थिए’, उनले भने, ‘अहिले एक दुईवटा कोठामा मात्र पर्यटक छन् ।’
देशभर आन्दोलन चलिरहँदा पनि सौराहाका होटलहरुमा पर्यटक राम्रै सङ्ख्यामा थिए । तर उनीहरु गएपछि थप पर्यटक आएनन् । क्षेत्रीय होटल संघ सौराहाका निवर्तमान अध्यक्ष दीपक भट्टराईले अन्तर्राष्ट्रिय जगतमा नकारात्मक सन्देश प्रवाह भएकाले ट्राभल एजेन्सीमार्फत पर्यटकले सुरक्षित हुन नसकिने भन्दै दैनिक एक सय हाराहारीमा इमेल र म्यासेज पठाइरहेको बताए ।
उनका अनुसार अहिले सौराहामा होटलको क्षमताको तुलनामा पाँच प्रतिशत पनि पर्यटक छैनन् । चितवन राष्ट्रिय निकुञ्ज घुम्नका लागि पर्यटक सौराहा आउने गर्दछन् । यो निकुञ्ज जंगल सफारीका लागि विश्वमै परिचित छ ।
