२०८३ भाद्र ४, बिहीबार १५:३९
काठमाडौं । नेपाल राष्ट्र बैंकमा रिक्त रहेको डेपुटी गभर्नरको पदमा अन्ततः राष्ट्र बैंककै कार्यकारी निर्देशक दीर्घबहादुर रावल नियुक्त भएका छन्।
राष्ट्र बैंकमा दुई जना डेपुटी गभर्नर रहने व्यवस्था छ। सरकारले सन् २०२६ अप्रिल ७ मा कार्यकारी निर्देशक किरण पण्डितलाई डेपुटी गभर्नरमा नियुक्त गरेको थियो। त्यसपछि लामो समयदेखि रिक्त रहेको अर्को पदमा रावललाई बुधबार बसेको मन्त्रिपरिषद् बैठकले नियुक्त गर्ने निर्णय गरेको हो।
अर्थमन्त्री डा. स्वर्णिम वाग्लेले मन्त्रिपरिषद् बैठकमा डेपुटी गभर्नरका लागि दुई जनाको नाम प्रस्ताव गरेका थिए। रावलसँगै डा. दिल्ली पोखरेलको नाम पनि सिफारिस गरिएको थियो। तर सरकारले अन्तिममा राष्ट्र बैंकको बैंक सुपरिवेक्षण विभागका प्रमुखका रूपमा कार्यरत कार्यकारी निर्देशक रावललाई डेपुटी गभर्नरमा नियुक्त गरेको हो।
नवनियुक्त डेपुटी गभर्नर रावल झन्डै २० वर्षदेखि नेपाल राष्ट्र बैंकमा कार्यरत छन्। उनीसँग वित्तीय क्षेत्रको नियमन, बैंकिङ सुपरिवेक्षण, मौद्रिक नीति विश्लेषण, मुद्रा व्यवस्थापन तथा सम्पत्ति शुद्धीकरण निवारण र आतंकवादमा वित्तीय लगानी नियन्त्रण (एएमएल/सीएफटी) लगायतका क्षेत्रमा काम गरेको अनुभव छ।
सन् २०१९ देखि २०२४ सम्म उनले नेपालको वित्तीय जानकारी इकाइ (एफआईयू) प्रमुखको जिम्मेवारीसमेत सम्हालेका थिए। वित्तीय क्षेत्रमा लामो अनुभव हासिल गरेका रावल काठमाडौं विश्वविद्यालय स्कुल अफ म्यानेजमेन्टमा वित्त विषयमा विद्यावारिधिका शोधार्थीसमेत हुन्।
नवनियुक्त डेपुटी गभर्नर दीर्घबहादुर रावल नेपाल राष्ट्र बैंकमा निकै अनुभवी र खारिएका व्यक्तित्वको रुपमा परिचित छन् । विसं २०६२ साल माघमा सहायक निर्देशकका रूपमा राष्ट्र बैंक प्रवेश गरेका उनले त्यसअघि नेपाल बैंक लिमिटेडमा सहायक प्रबन्धकका रूपमा काम गरेका थिए।
नेपाल राष्ट्र बैंकमा प्रवेश गरेपछि उनको प्रारम्भिक जिम्मेवारी आर्थिक अनुसन्धान विभाग र बैंक तथा वित्तीय संस्था नियमन विभागमा रहेको थियो। त्यसपछिका दिनमा उनले राष्ट्र बैंककै महत्वपूर्ण विभागहरूको जिम्मेवारी सम्हाले।
सन् २०१८ मा लोक सेवा आयोगबाट निर्देशक पदका लागि भएको प्रतिस्पर्धामा उनी प्रथम भएका थिए।
रावलको करियरको महत्वपूर्ण अध्याय वित्तीय जानकारी इकाइ (एफआईयू) सँग जोडिएको छ। उनले सन् २०१९ देखि २०२४ सम्म वित्तीय जानकारी इकाइको नेतृत्व गरेका थिए।
उक्त इकाइको मुख्य काम शंकास्पद कारोबार तथा गतिविधिसम्बन्धी सूचना प्राप्त गर्ने, विश्लेषण गर्ने र आवश्यकताअनुसार सम्बन्धित नियामक तथा अनुसन्धान गर्ने निकायलाई वित्तीय गुप्तचर सूचना उपलब्ध गराउनु हो। रावलले यही क्षेत्रमा लामो समय नेतृत्वदायी भूमिका निर्वाह गरेका थिए। राष्ट्र बैंकको आधिकारिक एफआईयूको वार्षिक प्रतिवेदनमा पनि रावललाई निर्देशक तथा प्रमुखका रूपमा उल्लेख गरिएको छ।
रावलको पछिल्लो जिम्मेवारी पनि महत्वपूर्ण थियो। सन् २०२५ मा उनलाई राष्ट्र बैंकको बैंक सुपरिवेक्षण विभागको प्रमुख बनाइएको थियो। त्यसअघि उनी निर्देशकबाट कार्यकारी निर्देशकमा बढुवा भएका थिए।
रावल काठमाडौं विश्वविद्यालय स्कुल अफ म्यानेजमेन्टमा पीएचडी शोधार्थीका रूपमा अध्ययनरत रहेको देखिन्छ। उनको शैक्षिक तथा व्यावसायिक रुचि बैंकिङ, अर्थतन्त्र, नियमन, सुपरिवेक्षण र सार्वजनिक नीतिसँग जोडिएको देखिन्छ।
उनले अर्थशास्त्रमा स्नातकोत्तर, व्यवस्थापनमा एमबीए र समाजशास्त्रमा स्नातकोत्तर गरेका छन्। उनी ‘सामना बैंकिङ पुरस्कार–२०१२’ बाट समेत सम्मानित व्यक्तित्व हुन्। उनको पुख्र्यौली घर भने अछाम रहेको छ।
