२०८३ असार २८, आईतवार ०९:२६
काठमाडौं । जारी विश्वकप फुटबलको क्वार्टरफाइनलमा स्वीट्जरल्यान्डविरुद्धको खेलमा अर्जेन्टिनाका खेलाडीहरू हातमा कालो आर्मब्यान्ड बाँधेर मैदानमा उत्रिएका छन्। यो कदम अर्जेन्टिनी राष्ट्रिय टोलीका पूर्वकप्तान एन्टोनियो राट्टिनप्रति श्रद्धाञ्जली व्यक्त गर्न गरिएको हो। राट्टिनको शनिबार निधन भएको थियो।
राट्टिन सन् १९६६ को फिफा विश्वकपमा अर्जेन्टिनाका कप्तान थिए। उनी अर्जेन्टिनाको प्रसिद्ध क्लब बोका जुनियर्सका उत्कृष्ट मिडफिल्डरमध्ये एक मानिन्थे। सोही विश्वकपमा इंग्ल्यान्डविरुद्धको क्वार्टरफाइनल खेलमा उनले पाएको विवादास्पद रेड कार्ड विश्वकप इतिहासकै चर्चित घटनामध्ये एक मानिन्छ।
अर्जेन्टिना–स्वीट्जरल्यान्ड खेल सुरु हुनुअघि हालै निधन भएका अफ्रिकी खेलाडी जाडेन एडम्सको सम्झनामा एक मिनेट मौनधारण पनि गरिएको थियो। तर अर्जेन्टिनी खेलाडीहरूले लगाएको कालो आर्मब्यान्ड भने एडम्सका लागि नभई एन्टोनियो राट्टिनप्रति विशेष सम्मान व्यक्त गर्न लगाइएको हो।
फुटबलमा प्रतिष्ठित खेलाडी, प्रशिक्षक वा अन्य फुटबल व्यक्तित्वको निधन हुँदा खेलाडीहरूले कालो आर्मब्यान्ड बाँधेर श्रद्धाञ्जली अर्पण गर्ने परम्परा लामो समयदेखि रहँदै आएको छ।
