२०८२ पुष ३०, मंगलवार ११:२९
अदानचुली । हिल्सास्थित यारी नाका भन्सार कार्यालय अत्यधिक जाडोका कारण तीन महिनाका लागि बन्द गरिएको छ। चीनको ताक्लाकोटबाट सामान तथा व्यापारीको आयात रोकिने क्रममा कारोबार ठप्प भएपछि कार्यालय बन्द गर्ने निर्णय गरिएको हो।
कार्यालय प्रमुख रामराज जैसीका अनुसार, पुसको दोस्रो हप्तादेखि चीनबाट सामान आयात रोकिएपछि भन्सार कर्मचारीहरू जिल्ला सदरमुकाम सिमकोटको सम्पर्क कार्यालयमा पुगेका छन्। उहाँले भने, “सामान आयात नभएका कारण हिल्सामा कार्यालय कुर्नु व्यर्थ भएकोले हामीले समन्वय गरेर कार्यालय बन्द गर्यौं।”
यस वर्ष हिमपात नभए पनि गत कात्तिकमा परेको हिउँले नारा सडकखण्ड अवरुद्ध बनाउँदा यातायात सेवा समेत प्रभावित भएको थियो।
जैसीका अनुसार, चीन तर्फको नाकालाई खुल्लै राखिएको छ र कर्मचारी चैतको दोस्रो हप्तामा फिर्ता भएपछि यारी नाका पुनः सञ्चालनमा आउनेछ। यस वर्ष साउनदेखि कार्यालयले १८ लाख ६५ हजार रुपैयाँ राजस्व असुली गरेको छ, जुन गत वर्षको भन्दा दोब्बर हो।
