२०८३ कार्तिक १९, बिहिवार १६:०७
काठमाडौं । चिनियाँ अटोमोबाइल ब्रान्ड चेरीले आफ्नो नयाँ विद्युतीय क्रसओभर चेरी क्यू प्रिमियम नेपाली बजारमा सार्वजनिक गरेको छ। नेपालका लागि आधिकारिक वितरक पायोनियर मोटो कर्प प्रालिले बिहीबार आयोजित भव्य कार्यक्रममा उक्त गाडी सार्वजनिक गरेको हो।
कम्पनीले चेरी क्यू प्रिमियमको मूल्य ३३ लाख ९९ हजार रुपैयाँ निर्धारण गरेको छ। आकर्षक मूल्यसँगै कम्पनीले गाडीमा ११ वर्ष वा २ लाख ४० हजार किलोमिटर (जुन पहिले आउँछ) सम्मको वारेन्टी उपलब्ध गराउने जनाएको छ। साथै, ग्राहकले अटोप्लस इन्स्योरेन्स सुविधा पनि प्राप्त गर्नेछन्।
४०० किलोमिटर रेन्ज, १६.५ मिनेटमै ५० प्रतिशत चार्ज
चेरी क्यू प्रिमियममा ४१.२ किलोवाट आवर क्षमताको एलएफपी ब्याट्री जडान गरिएको छ। पछाडिको पाङ्ग्रामा शक्ति प्रवाह गर्ने प्रणालीमा आधारित यसको म्याग्नेटिक मोटरले अधिकतम ९० किलोवाट शक्ति र ११५ न्युटन मिटर टर्क उत्पादन गर्छ।
कम्पनीका अनुसार गाडीले एकपटक पूर्ण चार्ज गर्दा ४०० किलोमिटरसम्मको एनईडीसी रेन्ज दिन्छ। छिटो चार्ज गर्ने प्रविधिबाट ब्याट्रीलाई ३० प्रतिशतदेखि ८० प्रतिशतसम्म पुर्याउन करिब १६.५ मिनेट लाग्ने कम्पनीको दाबी छ।
५४० डिग्री क्यामेरादेखि अत्याधुनिक सुरक्षा प्रविधिसम्म
चेरी क्यू प्रिमियममा सुरक्षाका लागि ६ वटा एयरब्याग, ५४० डिग्री प्यानोरामिक क्यामेरा, विद्युतीय स्थिरता नियन्त्रण प्रणाली र उकालोमा गाडी पछाडि नचिप्लिने सहायता प्रणाली उपलब्ध छन्।
त्यस्तै, अनुकूल गतिनियन्त्रण प्रणाली, लेन छाड्ने चेतावनी, ब्लाइन्ड स्पट पहिचान र स्वचालित आपत्कालीन ब्रेकिङजस्ता चालक सहायता प्रविधिसमेत समावेश गरिएको छ।
गाडीको लम्बाइ ४ हजार १९५ मिलिमिटर, चौडाइ १ हजार ८११ मिलिमिटर र उचाइ १ हजार ५६८ मिलिमिटर छ। यसको ह्विलबेस २ हजार ७०० मिलिमिटर र ग्राउन्ड क्लियरेन्स १७५ मिलिमिटर रहेको छ।
सामान राख्नका लागि अगाडि ७० लिटर क्षमताको फ्रंक र पछाडि ३७५ लिटरको बुट स्पेस दिइएको छ। पछाडिका सिट फोल्ड गर्दा बुट स्पेस १४५० लिटरसम्म विस्तार गर्न सकिने कम्पनीले जनाएको छ।
देशभर शोरुम विस्तार गर्दै पायोनियर मोटो
गाडी सार्वजनिक गर्दै पायोनियर मोटो कर्पका प्रबन्ध निर्देशकले चेरी क्यूमार्फत नेपाली ग्राहकलाई विश्वस्तरीय अटोमोबाइल प्रविधि र स्मार्ट मोबिलिटी समाधान उपलब्ध गराउने प्रतिबद्धता व्यक्त गरे।
कम्पनीका अनुसार ग्राहकले चेरी क्यू प्रिमियम काठमाडौंको थापाथलीस्थित चेरी शोरुमसहित बुटवल, विराटनगर, दाङ, चितवन र बिर्तामोडका शोरुममा अवलोकन गर्न सक्नेछन्।
चेरीले विश्वका १३० भन्दा बढी देश तथा क्षेत्रमा आफ्नो उपस्थिति रहेको र दुई करोडभन्दा बढी प्रयोगकर्ता रहेको जनाएको छ।
३३ लाख ९९ हजार रुपैयाँको मूल्य, ४०० किलोमिटरको दाबी गरिएको रेन्ज र ११ वर्षसम्मको वारेन्टीसहित आएको चेरी क्यू प्रिमियमले नेपाली विद्युतीय सवारी बजारमा प्रतिस्पर्धा थप रोचक बनाउने देखिन्छ।
