२०८३ श्रावण २७, बुधबार ०७:४९
काठमाडौँ । कोलम्बियामा गएको शक्तिशाली भूकम्पमा परी मृत्यु हुनेको संख्या १८० नाघेको छ।
भूकम्पबाट सबैभन्दा बढी प्रभावित काली र पेरेरा सहरमा उद्धार तथा खोजी कार्य अझै जारी छ। भग्नावशेषमा फसेकाहरूको खोजी तथा उद्धारका लागि उद्धारकर्मीहरू दिनरात खटिरहेका छन्।
सरकारी तथ्यांकअनुसार भूकम्पमा परी हालसम्म १८१ जनाको मृत्यु भएको पुष्टि भएको छ। यद्यपि स्थानीय अधिकारीहरूले उपलब्ध गराएको तथ्यांकसमेत जोड्दा मृतकको संख्या २४० भन्दा बढी हुन सक्ने अन्तर्राष्ट्रिय सञ्चारमाध्यमहरूले जनाएका छन्।
गत सोमबार बिहान ७ः३४ बजे ७.४ म्याग्निच्युडको शक्तिशाली भूकम्प गएको थियो। भूकम्पका धक्का पश्चिमी कोलम्बियाका सयौँ माइल टाढासम्म महसुस गरिएको थियो। मंगलबार पनि भूकम्पपछि आउने परकम्पहरू महसुस भएका थिए।
भूकम्पबाट करिब २ हजार ६ सय जना घाइते भएको र झन्डै २ सय जना अझै बेपत्ता रहेको राष्ट्रपति अबेलार्डो डे ला एस्प्रिएलाले जानकारी दिएका छन्। उनले देशमा आपत्काल घोषणा गरेका छन्।
राष्ट्रपति मंगलबार भूकम्पबाट सबैभन्दा बढी प्रभावितमध्ये एक पेरेरा सहर पुगेका थिए। त्यस क्रममा उनले १ हजार १ सयभन्दा बढी घर पूर्ण रूपमा ध्वस्त भएको र ८ हजारभन्दा बढी घरमा क्षति पुगेको जानकारी दिएका थिए।
भूकम्पपछि पेरेरा, कालीलगायतका सहरमा ठूलो संख्यामा मानिस विस्थापित भएका छन्। सोमबार रातिदेखि मंगलबार बिहानसम्म धेरै मानिसले खुला आकाशमुनि रात बिताएका थिए। घर पूर्ण रूपमा ध्वस्त भएका परिवारसँगै भवन पुनः भत्किन सक्ने डरका कारण कतिपय मानिस घरभित्र प्रवेश नगरी बाहिरै बसेका थिए।
उद्धारकर्मीहरूले भग्नावशेषमा फसेकाहरूको खोजीलाई प्राथमिकतामा राखेर काम गरिरहेका छन्। बेपत्ता व्यक्तिको संख्या बढ्न सक्ने भएकाले मृतक तथा घाइतेको वास्तविक संख्या अझै बढ्न सक्ने अधिकारीहरूले बताएका छन्।
