२०८३ कार्तिक ५, बुधबार १०:४२
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले बडादशैँ (विजयादशमी), २०८३ को अवसरमा स्वदेश तथा विदेशमा रहेका नेपालीलाई सुख, शान्ति, सुस्वास्थ्य, समृद्धि र उत्तरोत्तर प्रगतिको शुभकामना व्यक्त गरेका छन् ।
जारी विज्ञप्तिमार्फत लामिछानेले यस वर्ष विपत्ति र शोकको घडीमा दशैँ मनाउनुपरेको उल्लेख गर्दै विपत्तिमा ज्यान गुमाउनेहरूप्रति श्रद्धाञ्जली अर्पण गरेका छन् । उनले शोकसन्तप्त परिवारजनप्रति गहिरो समवेदना पनि व्यक्त गरेका छन् ।
विपत्तिका कारण धेरै नागरिकले अमूल्य जीवन गुमाउनुपरेको र हजारौँ परिवार घरबारविहीन तथा विस्थापित भएको उल्लेख गर्दै उनले यस्तो संवेदनशील परिस्थितिमा विजयादशमीले नेपाली समाजमा सकारात्मक ऊर्जा र एकताको भावना अभिवृद्धि गर्ने विश्वास व्यक्त गरेका छन् ।
लामिछानेले दशैँले नेपाली समाजलाई विगतभन्दा अझ सुदृढ बनाउँदै अभूतपूर्व एकताको सूत्रमा बाँध्ने विश्वाससमेत व्यक्त गरेका छन् ।
विज्ञप्तिमा उनले नवदुर्गा भवानीले सबैलाई व्यक्तिगत स्वार्थभन्दा माथि उठेर राष्ट्र र जनताको सर्वोपरि हितमा निःस्वार्थ भावले समर्पित हुने शक्ति, सद्बुद्धि र सङ्कटसँग जुध्ने साहस प्रदान गरून् भन्ने कामना गरेका छन् ।
असत्यमाथि सत्य र अन्यायमाथि न्यायको विजयको सन्देश बोकेको विजयादशमीले निराशाबाट आशातर्फ र विपत्तिबाट नवनिर्माणतर्फ अघि बढ्न नयाँ ऊर्जा प्रदान गर्ने विश्वास पनि उनले व्यक्त गरेका छन् ।
लामिछानेले सकारात्मक ऊर्जा, आपसी सद्भाव र नयाँ आशासहित सबै नेपालीलाई विजयादशमीको शुभकामना दिएका छन् ।
