२०८३ आश्विन ४, आईतवार ०९:०७
काठमाडौँ । यमनका इरानसमर्थित हुथी विद्रोहीले साउदी अरबको राजधानी रियादमा ब्यालेस्टिक तथा क्रुज क्षेप्यास्त्र र ड्रोनबाट आक्रमण गरेको दाबी गरेका छन्।
हुथीका सैन्य प्रवक्ता याह्या अल–सरीअका अनुसार रियादका संवेदनशील क्षेत्र तथा रेड सी तटमा रहेका साउदी तेल कम्पनी अराम्कोका संरचनालाई लक्षित गरी आक्रमण गरिएको हो।
तर, साउदी अधिकारीहरूले रियादतर्फ प्रहार गरिएको एउटा ब्यालेस्टिक क्षेप्यास्त्रलाई हवाई प्रतिरक्षा प्रणालीले नष्ट गरेको बताएका छन्। अन्य आक्रमणबारे भने साउदी पक्षले पुष्टि गरेको छैन। आक्रमणबाट भएको मानवीय क्षतिको विवरण पनि सार्वजनिक गरिएको छैन।
शनिबार रियादस्थित किङ खालिद अन्तर्राष्ट्रिय विमानस्थलनजिकैको इन्धन भण्डारण क्षेत्रमा कालो धुवाँ देखिएको थियो। घटनापछि केही समय विमान उडानमा समेत अवरोध भएको बताइएको छ।
साउदी नेतृत्वको गठबन्धनका अनुसार बिश, ताइफ, फरासान र यान्बुमा पनि नागरिकलाई लक्षित गर्ने प्रयासलाई हवाई प्रतिरक्षा प्रणालीमार्फत रोकिएको थियो।
हुथी र साउदी समर्थित यमन सरकारबीच जारी द्वन्द्वका कारण क्षेत्रमा तनाव बढ्दै गएको छ। संयुक्त राष्ट्रसंघको अन्तर्राष्ट्रिय आप्रवासन संगठनका अनुसार पछिल्लो लडाइँका कारण यमनमा विस्थापित हुनेको संख्या १ लाख ४ हजारभन्दा बढी पुगेको छ।
