२०८२ श्रावण २९, बिहीबार १६:२७
काठमाडौं । प्रधानमन्त्री केपी ओलीसँग दुई उपप्रधानमन्त्रीसहित सबै मन्त्रीले कार्यसम्पादन सम्झौता गरेका छन् ।
बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित कार्यक्रममा एक वर्षका लागि कार्यसम्पादन सम्झौता भएको हो ।
मन्त्रीहरूले अबको एक वर्षमा आफूलाई प्रधानमन्त्री कार्यालयले दिएको कामको रिपोर्ट कार्ड पेस गर्नुपर्ने छ । कार्यसम्पादन सम्झौता गर्नेमा उपप्रधानमन्त्रीद्वय प्रकाशमान सिंह र विष्णु पौडेल पनि छन् ।
यस्तै, गृहमन्त्री रमेश लेखक, परराष्ट्रमन्त्री आरजु राणा देउवा, शिक्षामन्त्री रघुजी पन्त, स्वास्थ्यमन्त्री प्रदीप पौडेल, कृषिमन्त्री रामनाथ अधिकारी, पर्यटनमन्त्री बद्री पाण्डे, रक्षामन्त्री मानवीर राई, खानेपानीमन्त्री प्रदीप यादव, सामान्य प्रशासनमन्त्री भगवती न्यौपानेलगायत छन् ।
मन्त्रीहरूसँग कार्यसम्पादन सम्झौता भएपछि अब मन्त्रिपरिषद् पुनर्गठनको सम्भावना सकिएको छ । केही समयदेखि प्रधानमन्त्री ओलीले मन्त्रीहरू हेरफेर गर्ने चर्चा थियो ।
अघिल्लो वर्ष भदौमा मन्त्रीहरूसँग कार्यसम्पादन सम्झौता भएको थियो । अब आउने असारमा प्रधानमन्त्री ओलीले सहमतिअनुसार कांग्रेस सभापति शेरबहादुर देउवालाई सकारको नेतृत्व हस्तान्तरण गर्नुपर्ने हुन्छ ।
प्रधानमन्त्री तथा मन्त्रिपरिषद्को कार्यालय, सिंहदरबारमा मन्त्रालयगत वार्षिक प्रगति समीक्षाका साथै अगामी कार्यक्रमको कार्यसम्पादन सम्झौतामा हस्ताक्षर भई आदानप्रदान भएको हो ।
‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न थालिएका पूर्वाधार निर्माण तथा सेवा प्रवाहमा सुधारका कार्यहरु तोकिएको समयमा सम्पन्न गर्न कार्यसम्पादन सम्झौताको अभ्यास प्रधानमन्त्री ओलीको विगतको कार्यकालमा आरम्भ गरिएको हो । प्रधानमन्त्रीसँग मन्त्रीहरुले कार्यसम्पादन सम्झौता गरेपछि मन्त्रीहरुले सम्बन्धित सचिवहरुसँग कार्यसम्पादन सम्झौता गर्नुपर्नेछ ।
