२०८३ असार २३, मंगलवार १०:०४
काठमाडौं । पूर्वी नेपालबाट काठमाडौं उपत्यका भित्रिने प्रमुख नाका साँगामा निर्माणाधीन अन्डरपासको भौतिक प्रगति करिब ९५ प्रतिशत सम्पन्न भएको छ। मुख्य संरचना र पहुँचमार्ग (एप्रोच सडक) निर्माणको काम पूर्ण रूपमा सकिएसँगै अब यहाँको यात्रा थप सहज र सुरक्षित हुने भएको छ।
अरनिको राजमार्गअन्तर्गतको सूर्यविनायक–धुलिखेल सडक विस्तार आयोजनाकै सबैभन्दा महत्त्वपूर्ण र आकर्षक हिस्सा मानिएको यो आधुनिक संरचनाले विगतमा यात्रीहरूले भोग्दै आएको सास्तीलाई इतिहास बनाउने विश्वास गरिएको छ।
भौगोलिक र इन्जिनियरिङ दृष्टिले व्यवस्थित रूपमा डिजाइन गरिएको यस अन्डरपासको कुल लम्बाइ १११० मिटर रहेको छ।
सडक संरचनाः कुल लम्बाइमध्ये बनेपातर्फ १९० मिटर र भक्तपुरतर्फ ९०० मिटरको एप्रोच सडक समावेश छ।
मुख्य अन्डरपासः यसको मुख्य संरचना १८ मिटर लामो छ, जसको उचाइ ६ मिटर र चौडाइ साढे १० मिटर रहेको छ।
वर्तमान कार्यप्रगतिः पहिलो चरणको कालोपत्रे सम्पन्न भइसकेको छ भने यतिबेला साइड रिटेनिङ वाल लगाउने र अन्तिम चरणको कालोपत्रे गर्ने काम द्रुत गतिमा भइरहेको छ।
यो आयोजना पूर्ण रूपमा सम्पन्न भएपछि काठमाडौं र भक्तपुरतर्फबाट बनेपातर्फ जाने सवारीसाधनहरू अन्डरपासको सुलभ मार्ग भएर गुड्नेछन् भने बनेपातर्फबाट काठमाडौं भित्रिने गाडीहरूले माथिल्लो सडक प्रयोग गर्नेछन्।
सडकको बाँकी काम गर्दा ट्राफिक व्यवस्थापन अस्तव्यस्त नहोस् भनी हाललाई विशेष व्यवस्था गरिएको छ। माथिल्लो लेनमा काम गर्दा सुरक्षित र सहज होस् भनेर अहिले काठमाडौंबाट बाहिरिने र भित्रिने दुवैतर्फका गाडीहरूलाई यही अन्डरपासको दुई लेनबाटै चलाउने तयारी गरिएको छ।
१५.८ किलोमिटर लामो सूर्यविनायक–धुलिखेल सडक विस्तार आयोजनालाई दुई खण्डमा विभाजन गरेर स्तरोन्नति भइरहेको छ ।
पहिलो खण्डको तुलनामा साँगादेखि धुलिखेलसम्मको सडक निर्माणको काम निकै द्रुत गतिमा अगाडि बढेको छ। आयोजनाको दोस्रोपटक म्याद थप गरी निर्माण अवधि २०८३ फागुन मसान्तसम्म पुर्याइएको छ।
आयोजना स्रोतका अनुसार समग्र आयोजनाको भौतिक प्रगति नै ९५ प्रतिशतको हाराहारीमा पुगिसकेकाले यसै वर्षभित्र सडकको सम्पूर्ण काम पूर्ण रूपमा सम्पन्न गर्ने लक्ष्य राखिएको छ। साँगा अन्डरपास निर्माणसँगै अरनिको राजमार्गमा यात्रा गर्ने आम सर्वसाधारणको समय बचत हुनुका साथै यातायात व्यवस्थापनमा यो पूर्वाधार एउटा महत्त्वपूर्ण कोसेढुंगा सावित हुनेछ।
