२०८३ भाद्र १५, सोमबार १९:१६
काठमाडौँ । सिटिजन लाइफ इन्स्योरेन्सले रसुवा जिल्लास्थित भोटेकोसी नदीमा आएको विनाशकारी बाढीपहिरोबाट प्रभावित नागरिक तथा समुदायको राहत र पुनःस्थापनाका लागि प्रधानमन्त्री दैवी प्रकोप उद्धार कोषमा १ करोड ५१ लाख रुपैयाँ सहयोग गरेको छ।
बाढीपहिरोका कारण रसुवालगायत प्रभावित क्षेत्रमा जनजीवन प्रभावित हुनुका साथै घर, सम्पत्ति तथा भौतिक संरचनामा ठूलो क्षति पुगेको अवस्थामा प्रभावित नागरिकलाई राहत तथा पुनःस्थापनामा सहयोग पुर्याउने उद्देश्यले इन्स्योरेन्सले उक्त रकम सहयोग गरेको जनाएको छ।
इन्स्योरेन्सका अध्यक्ष प्रदीपजंग पाण्डे र प्रमुख कार्यकारी अधिकृत पोषकराज पौडेल सहितको टोलीले उक्त सहयोग रकम अर्थमन्त्री स्वर्णिम वाग्लेलाई हस्तान्तरण गरेको हो।सहयोग रकम हस्तान्तरण गर्दै इन्स्योरेन्सले प्राकृतिक विपद्का कारण समस्यामा परेका नागरिक तथा समुदायप्रति आफ्नो सामाजिक उत्तरदायित्वअन्तर्गत सहयोग गरेको जनाएको छ। विपद्को समयमा प्रभावित नागरिकलाई तत्काल राहत उपलब्ध गराउनुका साथै दीर्घकालीन रूपमा पुनःस्थापना तथा पुनर्निर्माणका कार्यमा समेत सहयोग आवश्यक रहेको इन्स्योरेन्सको भनाइ छ।
प्रधानमन्त्री दैवी प्रकोप उद्धार कोषमा जम्मा गरिएको उक्त रकम बाढीपहिरोबाट प्रभावित नागरिक तथा समुदायको राहत, उद्धार र पुनःस्थापनाका लागि उपयोग हुने विश्वास इन्स्योरेन्सले लिएको छ।
भोटेकोसी नदीमा आएको बाढीका कारण रसुवाका विभिन्न क्षेत्रमा ठूलो क्षति पुगेको छ। बाढीपहिरोका कारण स्थानीयवासीको दैनिक जीवन प्रभावित हुनुका साथै आवागमन, पूर्वाधार तथा निजी सम्पत्तिमा समेत क्षति पुगेको अवस्थामा सरकारी तथा गैरसरकारी क्षेत्रबाट राहत तथा पुनःस्थापनाका लागि सहयोग जुटाउने क्रम जारी छ।
सिटिजन लाइफ इन्स्योरेन्सले पनि विपद्बाट प्रभावित नागरिकलाई परेको कठिन परिस्थितिमा साथ दिन र राहत तथा पुनःस्थापनाका प्रयासमा योगदान पुर्याउन उक्त सहयोग गरेको जनाएको छ। इन्स्योरेन्सका अनुसार सामाजिक उत्तरदायित्वअन्तर्गत यस्ता विपद्का समयमा प्रभावित नागरिक तथा समुदायलाई आवश्यक सहयोग उपलब्ध गराउने कार्यलाई प्राथमिकतामा राखिएको छ। आगामी दिनमा पनि समुदायको हित तथा विपद् प्रभावित नागरिकको सहयोगका लागि आवश्यक पहललाई निरन्तरता दिने प्रतिबद्धता इन्स्योरेन्सले जनाएको छ।
